ភ្នំពេញ៖ អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវីរសេនីយ៍ សាន សុខសីហា បានបញ្ជាក់ប្រាប់ EAC News ថា នៅរសៀលម៉ោង២ ថ្ងៃពុធនេះ អាជ្ញាធរបានកសាងសំណុំរឿងបញ្ជូនលោក យឹម ស៊ីណន និងលោក ហ៊ុន កុសល ទៅតុលាការហើយ។

បើតាមលោកវីរសេនីយ៍ សាន សុខសីហា អាជ្ញាធរបានបញ្ជូនទៅតុលាការនៅរសៀលថ្ងៃទី២២ ខែមីនា ក្រោមបទចោទចំនួន២ គឺការញុះញុង និងការប្រមាថព្រះមហាក្សត្រ។

អ្នកនាំពាក្យបានបញ្ជាក់ថា លោក យឹម ស៊ីណន ត្រូវបានសមត្ថកិច្ចឃាត់ខ្លួននៅក្នុងខណ្ឌដង្ហោ ហើយលោក ហ៊ុន កុសល ត្រូវបានឃាត់ខ្លួននៅក្នុងខណ្ឌពោធិ៍សែនជ័យ ដោយពួកគេត្រូវបានបញ្ជូនមកសាកសួរនៅស្នងការដ្ឋាននគរបាលរាជធានីភ្នំពេញកាលពីល្ងាចថ្ងៃទី២១ ខែមីនា ឆ្នាំ២០២៣។

ចំណាត់ការលើអតីតសកម្មជនប្រឆាំងទាំងពីររូបនេះ គឺធ្វើឡើងស្របពេលសម្តេចបានប្រកាសនៅក្នុងពិធីប្រគល់សញ្ញាបត្រជូនដល់និស្សិតវិទ្យាស្ថានវ៉ាន់ដានាព្រឹកថ្ងៃទី២២ ខែមីនា ឆ្នាំ២០២៣​ ថាសម្តេចមិនអត់ឱនអធ្យាស្រ័យឱ្យអ្នកទាំងពីរផងដែរ ខណៈកន្លងមកសម្តេចធ្លាប់បានលើកលែងឱ្យលោក យឹម ស៊ីណន ម្តងរួចមកហើយ ហើយសម្តេចក៏មិនទទួលការសុំទោសពីអ្នកទាំងពីរដែរ។

យោងតាមមាត្រា៤៩៦ នៃច្បាប់ក្រមព្រហ្មទណ្ឌ អំពើញុះញង់ដោយផ្ទាល់តាមមធ្យោបាយណាមួយ ត្រូវផ្តន្ទាទោសដាក់ពន្ធនាគារពី ១ឆ្នាំទៅ ៣ឆ្នាំ និងពិន័យជាប្រាក់ពី ២លានរៀល ទៅ៦លានរៀល ប្រសិនបើការញុះញង់នេះគ្មានប្រសិទ្ធភាពទេ។

ចំពោះបទប្រមាទព្រះមហាក្សត្រវិញ យោងតាមច្បាប់ស្តីពីវិសោធនកម្មក្រមព្រហ្មទណ្ឌឆ្នាំ២០១៨ បុគ្គលដែលបានជេរប្រមាទព្រះមហាក្សត្រ នឹងត្រូវផ្តន្ទាទោសដាក់ពន្ធនាគារពី ១ឆ្នាំ ទៅ៥ឆ្នាំ និងពិន័យជាប្រាក់ពី ២លានរៀល ទៅ ១០លានរៀល៕